Teks Masrahke Manten

 

Gambar : Penulis (Nganggo Surjan) nalika lagi ngayahi tugas

 ing adicara resepsi manten

Masrahke Manten

Assalamu’alaikum wr.wb.

Alahamdulillahi robbil ‘alamiin....

Mugi karahayon, berkah, saha sih wilasa dalem Allah Swt. Tansah rinentah dhumateng panjanengan dalasan kula, samenika saha salami-laminipun.

*Para pepundhen, pinisepuh ingkang pana ing pamawas miwah lebda ing pitutur.

* Para priyagung satriyaning negari pangemban pangembating praja ingkang winengku ing pakurmatan.

* Sanggya para tamu kakung putri mirungganipun keluwarga ageng kadang besan sutresna, mboten kapiji sedaya ingkang pantes nampi pakurmatan.

Nuwun sewu, awit saking keparengipun Bapak ............................. kalenggahan menika kula katimbalan saha kadhawuhan , kinen ngaturaken menggah ingkang dados wigatosing sowan kula sarombongan sowan wonten ing papan menika.

            Ingkang menika, menawi mangke atur kula nalisir saking leres, inggih ucap, patrap, tindak tanduk kirang nuju prana dhumateng ngersanipun panjenengan sedaya, kula nyuwun lumunturing samudra pangaksami.

            Saderengipun mugi kepareng kula ndherekaken muji sukur dhumateng Ngarsa Dalem Allah Swt.ingkang sampun paring nugraha tumanduk kula panjenengan sedaya sengga ing wekdal menika saget lenggah ing pasamuan menika kanthi wilujeng, widada, rahayu nir ing sambekala. Solawat, salam mugi tansah kasok dhumateng junjungan kula panjenengan sedaya, nun inggih Kanjeng Nabi Agung Muhammad Saw. Ingkang tansah kantu-antu syafangatipun benjing ing dinten kiyamat.

            Ingkang sepisan, kula ngaturaken salam taklim saking Bapak....sekaliyan nun inggih tiyang sepuhipun  Rara Ayu....tumanduk dhateng Bapak............sekaliyan tiyang sephipun Bagus.....kanthi Atur :

            “Assalamu’alaikum wr.wb”

Ingkang salajengipun, Bapak...............sekaliyan, ingkang kinormatan. Ing riki kula sowan mboten sanes ndherekaken pinangantyan kekalih nun iinggih Bagus.........saha Rara Ayu............. ingkang ing wekdal kapengker awit saking donga pengestunipun para pinisepuh saha para rawuh ing riki sampun kelampahan kaijabkabulaken kanthi wilujeng nir ing sambekela sedayanipun.

            Ingkang menika pinangten samenika dipun boyong ing dalem riki. Ing mbok bilih mangke wekdal salajengipun, Rara Ayu....ndhrerek ing dalem riki menapa dene sesrawungan ing masyarakat, kula suwun Bapak.....sekaliyan saha tangga tepalih, masyarakat wontena keparengipun paring wulang wuruk .

            Jer, Rara Ayu...senajan sampun lulus saking pawiyatan inggil nanging ing bab sesrawungan menapa dene mangun bale somah dereng gadhah pengalaman. Semantena, mbok bilih Bagus ....cumondhok ing dalemipun Bapak.....sekaliyan badhe dipun wulang wuruk kanthi saksae-saenipun.Ugi badhe karengkuh kados putra piyambak .

            Para rawuh, mekaten ingkang dados wigatosing sowan kula sarombongan ing wekdal menika. Mbok bilih wonten lepat kula, kula nyuwun lumunturing samodra pangaksami.

            Wassalamu’alaikum wr.wb.  

Kowen, 25 Mei 2010

Eswe Sidi

	Menika namung prasaja, para maos saget ngembangaken malih kanthi mendhet saking sumber-sumber sanesipun, nuwuuuuuuuuuuuuuuuun.